الارنب ارنوب

ازيكم يا كتاكيت
يلا ابتدي الحكايه
كان ياما كان كان في يوم من الايام كان في ايه
كان في ارنب اسمه الارنب ارنوب


كل يوم يقوم من الصبح ماما تعطيله الفطار خس وجزر
ياكل ارنوب ويطلع يلعب في الحديقه

وفي يوم من الايام صحي الصبح ماما جبتله خس وجزر فقالها :لا ياماما هو مفيش غير خس وجزر خس وجزر
وخرج ارنوب غضبان من غير ما يفطر ومشي بعيد وهو بيعيط
وفضل ماشي يعيط وهو ماشي قابل مين
قابل البقره سوسن اول ماشفته سوسن اتخضت عليه وسألته مالك يا ارنوب



رد ارنوب وعنيه مليانه دموع وقالها انا جعان
قالتله خلاص مطعيتش وراحت جابته اكل من عندها
فرح ارنوب بس رجع تاني يعيط
قالتله بتعيط ليه تاني
قالها انتي جيبه لي تبن وانا مش بعرف اكل التبن
وسابها ومشي وهو بيعيط
وفضل ماشي ماشي وبقي جعان خالص ومش لاقي اكل ياكل
بص من بعيد شاف الكلب هوهو بيقرب منه



سأله هوهو مالك يا ارنوب خير بتعيط ليه
رد ارنوب وهو مش قادر يتكلم من التعب والجوع وقاله انا جعان
قاله هوهو خلاص متزعلش وتعالي معايا
وراحوا الاتنين بيت هوهو وفتح هوهو التلاجه وجابله عظمه
قاله ارنوب لا انا مش بعرف اكل العظم انا مش بعرف اكل من الاكل بتاعك
ومشي ارنوب وهو بيعيط جامد
فقابل مين قابل المعزه توحه سألته توحه مالك يا ارنوب بتعيط ليه



قالها ارنوب انا جعان خالص ياتوحه
قالتله خد اكل من معايا وجابتله ورق كتير
قالها ارنوب لا انا مش بعرف اكل ورق انا مش بعرف اكل من اكلك
ورجع يمشي تاني وهو قاعد يعيط
لغايه ما تعب من كتر المشي فقال انا هقعد استرح شويه جنب شط البحر



وهو قاعد شاف علي الشط التاني مزرعه خس وجزر
فرح ارنوب خالص وراح ياكل
بس ياخبر هيعدي الناحيه التانيه ازاي
وهو قاعد شاف السمكه نيمي في البحر من بعيد



فقال انا هعمل عليها خدعه واضحك عليها واعدي الناحيه التانيه
فقالها ياسمكه نيمي تعالي عاوز اقولك حاجه
قالتله خير يا ارنوب
قالها انا عيالي اكثر من عيالك



قالتله لا انا عيالي اكتر
قالها خلاص هاتي ولادك وانا اعدهم علشان نشوف مين كلامه صح
نزلت نيمي وجابت سمك كتير وقالتله دول عيالي

قالها خلاص استني لما اعدهم واحد اتنين تلاته
لا لا يا سمكه نيمي انا مش عارف اعدهم وقفيهم بترتيب صف جنب بعض من اول الشط ده للشط ده
وفي ثواني كانت نيمي رتبت اولادها من الشط ده للشط التاني
فارنوب عمل ايه نط علي السمكه الاولي وقال واحد وعلي السمكه التانيه وقال اتنين وعلي السمكه التالته وقال تلاته وهكذا لحد ماوصل للشط التاني وراح ينط علي الشط التاني
في الوقت ده فهمت السمكه نيمي خدعة ارنوب قامه نطت وعضت ديله جامد
قعد ارنوب يعيط بس علشان كان جعان نسي الوجع وقعد ياكل خس وجزر لغايه ماشبع وقال اروح البيت لماما بقي
بس هيروح ازاي
الليل بدأ يدخل والجو يضلم وارنوب خايف وقعد يعيط
في الوقت ده ماما قلقت علي ارنوب وخرجت تدور عليه

وهي ماشيه شافت البقره سوسن سألتها مشفتيش ارنوب
قالتلها انا شفته كان بيعيط وجعان ومشي الناحيه دي
ماما قالتها شكرا ياسوسن ومشت تدور علي ارنوب
وهي ماشيه شافت هوهو وتوحه قاعدين مع بعض
سألتهم ماشوفتوش ارنوب قالو لها كانت بيعيط وجعان ومشي ناحية البحر
قعدت ماما ماشيه لغاية ماوصلت للبحر وشافت ارنوب قاعد يعيط الناحيه التانيه
قالتله يارنوب متخفش يا حبيبي انا هجي واعديك
وجرت ماما وراحت للنجار وطلبت منه يعملها مركب




واخدته وراحت عدت البحر وراحت لارنوب
واخدته في حضنها
قالها ياماما انا اسف ومعتش هزعلك تاني وهاكل الاكل اللي تجيبهولي
وروح مع ماما البيت ورجع تاني كل يوم يصحي الصبح ياكل خس وجزر ويطلع يلعب في الحديقه
وتوته توته خلصتي يا حدوته
مستنيه الردود والتعليقات
[img][/img][img][/img]

ههههههههههههههههههههه حلوة